Saçında sərvət olduğunu bilirsənmi?
saç
Hələliksə ondan başlayaq ki, son illərdə gənc qızlar üçün az qala xəstəlik həddinə çatan məsələlərdən biri də uzun saçdır. Uzun saçlı görünmək istəyənlər toya-düyünə gedəndə xalq arasında adına “şinyon”, “at quyruğu” deyilən saçlardan istifadə edirlər. Daha çox özləri alır, ala bilməyəndə bir günlüyünə gözəllik salonundan kirayə götürürlər. Bu da adına saç sektoru deyilən sahənin inkişafı ilə nəticələnib. Başda Hindistan olmaq üzrə Özbəkistan və Çindən idxal edilən saçlar bazarda böyük maraq doğurur. Amma bununla bərabər, yerli bazardakı saçlar ən çox axtarılanlardır. Buna səbəb həm onların keyfiyyəti, həm də daha güvənli olmasıdır. Hazırda Türkiyədə “uzun saç bazarı” deyilən bir sahə var ki, sahənin təmsilçiləri kənd-kənd gəzərək, daha aşağı qiymətə kənd qızlarından saç satın alırlar.
 
Saçında sərvət olduğunu bilirsənmi?
Xüsusən Türkiyənin kənd yerlərində uzun və gur saçlarını kəsib satanlar ailə büdcəsinə xeyir vermək istəyənlərdir. Onların saçları kiloqramla satılır, bir kiloqramı isə 400 manata yaxındır. Daha çox gözəllik salonu işçiləri tərəfindən satın alınan saçlar şəhərdə müştəriyə daha baha qiymətə satılır. Üstəlik, bu cür təqdimatla – kənd qızlarının təravətli saçı.

Türkiyədə qram hesabıyla satılan saçlar sahiblərinə 100-250 manat gəlir gətirir. Amma hər birinin gözəl saçlarını kəsdirmələrinin fərqli hekayələri var. Kimsə uşağını oxutmaq, bir başqası ailə büdcəsinə xeyir vermək üçün saçını kəsdirmək məcburiyyətində qalır. Adanada, saç sektorunda təxminən 15 ildir fəaliyyət göstərən Mehmet Kasım Güneş bildirib ki, təbii saçların kilosunun satış qiyməti 400 manatdan başlanır. Saç telinin qalınlığı və uzunluğuna görə bu qiymət 1500 manata qədər də çata bilər.

 

Avropa Birliyindən dəstək alan saçlar.
Avropa Birliyi İnformasiya Mərkəzinin dəstəyi ilə Cənubi Koreyadan gətirdiyi 5 qurğu ilə saçlardan parik hazırlayan Sərdar Mura isə tələbatı ödəmək üçün maaşla işlətdiyi motosikletli işçiləri, ya da kənddəki vasitələrlə saç yığdırır. Bu sektorda 1972-ci ildən bəri olan və məsləyi atasından öyrənən Mura birbaşa tacirlərlə əlaqə yaradır. Sonuncular kəndlərdə saçını satmağa ehtiyacı olanlarla danışır və qiymətdə razılaşandan sonra onlarla danışıq aparırlar.

Hazırda Türkiyədə sintetik saçların hazırlanması ilə məşğul olan konkret müəssisə yoxdur. Buna görə də xam saçlar kəndlərdən alınaraq gözəllik salonlarında hazırlanır. Bu zaman saçlar müştərinin istəyinə uyğun modelə salınır, rəng verilir və hazırlanır. Bu sektorun qarşılaşdığı ən ağrılı hekayə isə oğlunu oxutmaq üçün dizindən aşağı saçlarını satan ana ilə bağlıdır. Mura danışıb ki, həmin qadın saçlarını ağlaya-ağlaya kəsdirib. Amma oğlunun universitet xərclərinin bir qismini ödəmək üçün bunun vacib olduğunu deyib.

Bu arada bir detalı da deyək ki, saç müştərilərinin əsas hissəsini xərçəng xəstəliyinə tutulan qadınlar təşkil edir. Belə ki, sonuncular kimya terapiyası mərhələsində tökülən saçları üzündən sıxıntılı günlər yaşayırlar. Keçəl görünmək istəməyən qadınlar məhz bu səbəbdən parikdən istifadə edirlər. Bundan başqa, həqiqi saçdan hazırlanan pariklər və qaynaqlar daha keyfiyyətli olur. Onlar daha gec yağlanır, gec çirklənir. Bu səbəbdən də onları ayda bircə dəfə yumaq kifayət edir. Belə saçların ömrü 2-3 ildir.

 

Saçında sərvət olduğunu bilirsənmi?
Qorxulu saç donorluğu – ölülərin saçından yararlanma.

Amma hər biznes kimi, bu biznesin də qaranlıq tərəfləri var. Belə ki, biznesin daha gəlirli olması üçün Türkiyədə, eləcə də üçüncü dünya ölkələrində qaranlıq yollara da baş vurulur. Bu günə qədər kriminal xronikada belə xəbərlərə tez-tez rast gəlinib: ölmüş qadının saçları morqda dibindən kəsildi. Xüsusən Afrika ölkələrində, habelə Türkiyənin ucqarlarında saç biznesinin belə qaranlıq tərəfləri olur. Bu, çox vaxt ölü yaxınlarının icazəsi ilə baş verir, çox vaxtsa cinayətkar qrupun morq işçiləri ilə əməkdaşlığının nəticəsi olur. Həmin variantda saç biznesi ilə məşğul olanlar daha ucuz və sərfəli yollarla gəlir əldə etmiş olurlar. Halbuki həkimlər ölü insan saçının insan orqanizminə xeyli zərərli olduğunu açıqlayırlar.

Bu arada, qaynaqların zərərləri də az deyil. Birincisi və ən önəmlisi, qaynaqdan daim istifadə edənlər yuyulandan sonra onun keyfiyyətinin aşağı düşməsindən, rənginin, parlaqlığının itməsindən şikayətlənirlər. Hətta bəzən ağarmış saçları rəngləyib satışa çıxaranlar da olur ki, sonuncu yuyulandan sonra tamamən ağ rəngə çevrilir. Bundan başqa, qaynaq saçlar saçın həqiqi köklərinə də yüklənmə verir ki, bu da son nəticədə saçların tökülməsinə səbəb olur.

Mütəxəssislər xəbərdarlıq edirlər ki, qeyri-peşəkar üsullarla qaynaq edilmiş saçlar müştəridə keçəlləşmə də yarada bilər. Qaynaqdan sonra saç xüsusi qulluq tələb edir. Məsələn, qaynaqdan sonra yaş saçla yatmaq məsləhət deyil. Yatmazdan əvvəl saç dolaşmasın deyə onu hörmək və ya səliqə ilə yığmaq lazımdır. Qaynaqdan sonra hər gün saç xüsusi daraqla daranmalıdır.

 

Saçında sərvət olduğunu bilirsənmi?
Qaynaq həm də keçəlləşdirir.

Saçının təbii şəkildə uzanmadığını deyənlərə gəlincə, mütəxəssislər bildirirlər ki, saçları daim müxtəlif kimyəvi məzmunlu əməliyyatlarla məhv etdikdə, əlbəttə ki, onlar uzanmaz. Əgər qaynaqdan danışsaq, bu, saçlara yandırıcı təsir göstərə bilər. Bəzən xanımlar gözəllik salonlarında bu proseduru etdirirlər, lakin bunun həm effekti az olur, həm də saçlara qırıcı təsir göstərir. Ən yaxşı məsləhət odur ki, qaynaq etdirmək fikrində olan xanımlar steril, təhlükəsiz və zəmanət verilən yerlərə getsinlər. Bəzən qaynağın yaratdığı problemlər o qədər dərin olur ki, bu zaman saçları kökündən kəsmək lazım gəlir. Əks təqdirdə yanıq saçlarla küçələrdə gəzmək lazım gəlir.

Daha bir maraqlı məqam. Bir tükə uzunluğundan asılı olaraq iki və daha artıq ağırlıqlı tükün yapışdırılması da uğurlu nəticə verə bilməz. Bu zaman saçda qaynağı təyin olunmuş müddətdən çox saxladıqda həmin o bir dənə saç teli kövrəkləşir, nəticədə seyrəlmə baş verir. Qaynaqları saxlama müddəti fərqlidir. Amma təyin olunmuş müddətdən çox saxlamaq, şübhəsiz ki, ziyandır. Hələ o saç hörülsə, yığılan düzümlər 7 saatdan çox saxlanılsa, lap məhvedici təsir göstərər.

Əvvəlki məqaləArzuolunan qadın olmağın yolları
Növbəti məqalədəHamiləlikdə cinsi həyat necə olmalıdır?